Zu Prometheus
Er brachte den Menschen das Feuer und begründete damit die Zivilisation. Zur Strafe liess ihn Göttervater Zeus an das Kaukasusgebirge ketten, wo ein Adler regelmässig seine Leber frisst, die sich immer wieder erneuert. Die beiden Texte «Läberli» und «Füür» setzten sich mit dieser Thematik auseinander.
Die kursiven Teile sind Leberreime, eine bis ins 16. Jahrhundert zurückreichende Form improvisierter Scherzgedichte. Sie wurden an passenden Stellen in den Textkörper implantiert.
läberli
mönsche mache, chatze bache, verbrönnti ärde henterloh
äsche esch ned nor zom dönge guet
& sowiter & so fort
& läberli
s bistro hed höt fröschi läberli
no e fläsche, heidi!
& si nemmt e wi!
& läberli …
zwöi vo dene wonderbare läberli!
—–
prometheus, er hangt ede wand
kene chräit noch ehm
wie ne esel ede wand
e scharfe schnabel hackt is fleisch
weisch, weisch, weisch, wa isch!?
—–
ede härd em tal e wüeschti gluet
e hässige föhn, wo schüür um schüür
dorf om dorf abtreit
d buebe & d meitschi send em chlee
wo de früehlig es welds ärdbeernäscht baut hed
är suecht chriesi em nasse vollmondliecht
& läberli, eis vo dene wonderbare, haarige läberli
& cervilasalat, chässchnette, bluetworscht
& läberli
so e nöi läbere esch wie es nöis läbe
wele alki träumt ned devo
jede tag e neui läbere z becho?
steck, steck, steck, steck
steck dini fädere i d läbere
schrib d stories wo de soff chotzt
em wissrum ghört dech kene schreie
e landschaft gspreizt bes brösmelet
überem damm esch em arsch
läbe ofre falltör
plomps & klo & sowieso
& läberli, zwöi vo dene wonderbare, blutverschwetzte läberli
d nacht muess doch no öppis härgah
«lieber nüt z nacht / als z nacht nüt»
mer strited üs wie chend om spelzüg
ech & das opfer vom ne morge
«Die Leber ist von einer Kuh und nicht von einer Ziege.
Ich sage lieber nichts dazu, in welchem Bett ich liege.»
de tag brecht a
die erschte zirrhosene zirrid
die erschte hepatype fahred zor arbet
prometheus, er hangt ede wand
kene chräit noch ehm
er muess ned go schaffe
flögelschläg fächered loft zue
es mormeli pfifft e gruess
verschwendt i bau
es dröhne, wie ne gschwolscht
lüter, lüter …
schnabel, schnabel!
zwöi kilo läbe
gierig, gierig!
wele alki träumt ned devo
jede tag e neui läbere z becho?
zvell drom, zwenig drenn
i wend & wolke, flöss & sonne
esch all so onglaublech glich
wie chasch vorusdänke wenn zroggluege muesch
zwösche zwöi flögelschläg setzts härz us
2.7 sekonde
ohni ässe, trenke, schlaf
ohni sonnebrille, greme, huet, onterhaltigsprogramm
& läberli
emmer weder
ohni läberli
zwöi vo dene wonderbare läberli!
& läberli!
& si e wi!
no e fläsche, heidi!
em bistro gets höt fröschi …
& läberli!
& so witer & so fort
äsche esch ned nor zom dönge guet
mönsche mache, chatze bache, verbrönnti ärde henterloh
füür
s füür chonnt zrogg of d ärde
us heitrem hemmel
ede nacht
s füür chonnd zrogg id stadt
– am morge früeh
zuefälligi hirechtige –
ziel wählt mer sech ned us
sie dränget sech eim uf
dörlöcherets bläch
schärbe, uswis
& paar körper
wo do leggid
tot & schön
wie mer so seid
de fall erledigt
quid pro quo & sowieso
—-
chrieg esch vor allem warte
seid eine wos muess wösse
lang passiert nüt
denn ganz schnell öppis
denn weder lang nüt
zerfrässni gsechter
vercholti stömpf
äsche esch ned nor zom dönge guet
tod & schön
of dampfende ächer
si wärdet zroggcho eines tages
si chömid als blueme zrogg
«send me dead flowers in the morning»
mer macht plän
plän för de chrieg
plän för de frede
verhandlet
wär fohd a
wär ged uf
wäm nötzts?
de zöis haltet en red
er weiss no ned
dasser abgsetzt esch
de zöis redt us färnsehs
ade langstross, in thai-take-aways
zöis redt us färnses
zor allgemeine lag
alles lachet ede beize
dihei of de couch
em kreissaal vo de gägewart
«Die Leber ist von einem Hecht und nicht von einem Reiher.
Dem Staate geht es ziemlich schlecht, es kreisen schon die Geier.»
en herrscher ohni macht
wie nes baby blott & helflos
send me dead flowers with the news
er malt met chride en chreis
zit wird no jede fäls abträge
s füür chonnt vom hemmel zrogg of d ärde
es ged nüt me z frässe
aber es god au so
wenn hesch z letchmol fährnse gseh?
es god au so
es git keh tribschtoff me!
aber es gad au so
d armee reglet vercher ufre lääre chrüzig
bevölkerung wird unter d ärde verleit
jünglinge warted bibbernd uf de feind
sie seiched sech id hose und schreid noch em mami
mami! mami! mami!
mueter, werom hesch du mech verloh!
herr, i dini händ legg esch min schoss …
eine vergiftet sini familie während de listz mondscheinsonate spilt
en premier-minischter lütet vom flughafe a isch niemmer do
wo ihn abholt
niemmer, niemmer wit & breit
em lazarett operiert ein betrukne arzt arzt in frauechleider en blinddarm use
mitre konsärvebüchsdeckel und auf de falsche site
und wenn das d höll isch seid eine, denn musses irgendwo no en himmel gäh
ned umgekehrt
en schwarzi witwe lohd sech id loft
wäeret emne rockkonzärt
was send das für auge
henter däm schleyer
was send das för gfühl, was för gedanke
henter dene auge
e lääri nato kasärne
wird gstörmt vom mob
e tunnel fresst sech döre bärg
die einzig verbendig
zom muetterland
bärge send au nor mure
mure, wo mönd gheie
harekrishnas tanzed singend dur druine
thai mönche in ss-uniforme
sind ines hotel gflohe
i de nöchi vo nürnberg
es ruhiget
ömu
«Wir wollen die Liebe zur Gefahr besingen, die Vertrautheit mit Energie und Verwegenheit. Wir wollen den Krieg verherrlichen – diese einzige Hygiene der Welt –den Militarismus, den Patriotismus, die Vernichtungstat der Anarchisten …» (Filippo Tommaso Marinetti: Manifest des Futurismus, erschienen in: Le Figaro, Paris, 20. Februar 1909)
chomm met! chomm met!
chomm!
chomm scho!
chomm met! chomm met!
chomm doch!
chomm!
was han ech do verlore
– gang elei
alli spilid nor no um verloreni zit
& eine tuuschet bimne strube dealer rum gäge zit i & zit gäge rum
was eim ächt düre chopf gahd wenner ade wand staht?
dieser junge mann hat einen pass abgegeben uuund schuss – die kugel zerfetzt den kopf des keepers. ist das zu glauben? Sehen sie die vorbereitungen für diese spektakuläre aktion. ist das nicht herrlich?
propagandakopfschuss
körper tribet em floss
bleich & ufdunse
niemmer wott ergendöppis gseh ha
keine wott ergendöppis ghört ha
keine wott ergendöppis säge
die intervention
ade gränze vor legaliät
zwöimal gälb isch rot
und jetzt flangge
rächts usse
do gits kes offside
nur on- & off-chnöpf
– wie fühlt sich das wohl a
wemmer usgschalte wird?
e drockwälle
s füür chonnt zrogg
als energie
warms bluet gorglet em rache
e hand wo sech drenn wäscht
dörs muul im rache
s füür chonnd zrogg of d ärde
usem hemmel
am morge früeh